ગીત: વિચારધારા ભીમની

7. આજ આવી છે આંગણે, વિચારધારા ભીમની રે !
   તમો હંપ કરીને હાલજો ભાયો, સામાજિક ન્યાયના માટે રે !
   (સોરઠા)
   આઘેરો છે વાસ, ગામ છેવાડે ઝુંપડાં ;
   અસ્મિતાનો નાશ, એની પળપળ વીંધે વેદના.
   ગાળો કાઢીને વેઠ વતાડે, જીભડી સીવી લે ;
   પગ ગળામાં બેડીયું બાંધી, અમે જીંદગી જીવી રે આજ આવી છે આંગણે ૦
   (સોરઠા)
   કૂવા કઠેડા બ્હાર, માથે મૂકી માટલાં ;
   દીન દુઃખિયાની નાર, ટીંપા માટે ટળવળે.
   નળ પાણીના નોંખા સ્ટેન્ડો દિલને દુઃભવે રે !
   ચકલીઓ તોડી છેક છેડાની બે, મનને મુંઝવે રે ! આજ આવી છે આંગણે ૦
   (સોરઠા)
   બાંધ્યા હોટલ બ્હાર, અલગ ચપણિયા ચાયના ;
   ઉપર હાથે ધાર એ તો રાંકના કપમાં રેડતા.
   બદતર દશા જાનવરોથી યે, માનવી ભોગવે રે !
   કરવી ક્યાં જઈ રાડું ફરીયાદું, સગા સહુ એમના બેઠા રે ! આજ આવી છે આંગણે ૦
   (સોરઠા)
   સાંભળીને આ સાદ, ઉઠજો ભાયો ઉંઘથી ;
   કરવા ક્રાંતિનાદ સહુ એક અવાજે બોલજો,
   દુઃખડાની દવા એક જ સાચી, વીરા સડકે આવો રે,
   સત્તામાં ભાગીદારી માટે કરજે હક્કનો દાવો રે…. આજ આવી છે આંગણે ૦
   
   
   રચનાકાળ ઃ ૧૯૯૦